Hamkorlik Shartnomasi

Birinchi Shop

HAMKORLIK SHARTNOMASI

birinchishop.uz CPA platformasi — reklamachilar uchun

Oxirgi yangilanish: 16.10.2026

DIQQAT: ushbu hujjat ommaviy oferta hisoblanadi. birinchishop.uz platformasida reklamachi sifatida ro'yxatdan o'tish orqali siz quyidagi shartlarni to'liq o'qib chiqqaningizni, tushunganingizni va ularga so'zsiz rozilik bildirganingizni tasdiqlaysiz. Shartlarga rozi bo'lmasangiz, platformadan foydalanmasligingizni so'raymiz.

1. UMUMIY QOIDALAR VA ATAMALAR

1.1. Ushbu Hamkorlik Shartnomasi (keyingi o'rinlarda — "Shartnoma") birinchishop.uz CPA platformasini boshqaruvchi yakka tartibdagi tadbirkor (keyingi o'rinlarda — "Platforma") va platformada ro'yxatdan o'tgan jismoniy shaxs — o'zini o'zi band qilgan shaxs yoki yakka tartibdagi tadbirkor (keyingi o'rinlarda — "Reklamachi") o'rtasidagi munosabatlarni tartibga soladi.

1.2. Ushbu Shartnoma O'zbekiston Respublikasining amaldagi qonunchiligi, jumladan Fuqarolik kodeksining ommaviy oferta va xizmat ko'rsatish to'g'risidagi qoidalari, "Elektron tijorat to'g'risida"gi, "Reklama to'g'risida"gi va "Shaxsga doir ma'lumotlar to'g'risida"gi qonunlar asosida tuzilgan.

1.3. Ushbu Shartnomada quyidagi atamalar qo'llaniladi:

  • Platforma — birinchishop.uz manzilidagi CPA tizimi va uning barcha bo'limlari.
  • Reklamachi — platformada ro'yxatdan o'tgan, 18 yoshga to'lgan muomalaga layoqatli jismoniy shaxs. Daromad olish uchun Reklamachi soliq organlarida o'zini o'zi band qilgan shaxs (faoliyat turi — "Ijtimoiy tarmoqlardagi faoliyat") yoki yakka tartibdagi tadbirkor sifatida ro'yxatdan o'tgan bo'lishi lozim.
  • Xolis hisobi — Reklamachining Paynet to'lov tashkilotining "Xolis" raqamli platformasidagi biznes hamyoni (16 xonali hisob raqami).
  • To'lov hujjatlari — Reklamachining guvohnomasi (o'zini o'zi band qilgan shaxs yoki yakka tartibdagi tadbirkor sifatida ro'yxatdan o'tganlik to'g'risida), F.I.O., JSHSHIR va Xolis hisobi raqami.
  • CPA (Cost Per Action) — bajarilgan va tasdiqlangan harakat uchun to'lov modeli.
  • Offer — platformada reklama qilish uchun taklif etilgan mahsulot.
  • Affiliate link — Reklamachiga biriktirilgan, u orqali kelgan buyurtmalarni aniqlash imkonini beruvchi maxsus havola.
  • Buyurtma (zakaz) — Reklamachining affiliate linki orqali kelib tushgan mijoz so'rovi.
  • Daromad (komissiya) — muvaffaqiyatli yakunlangan buyurtma uchun Reklamachiga hisoblanadigan mukofot.
  • Balans — Reklamachining platformadagi hisobida to'plangan va yechib olish mumkin bo'lgan mablag'i.
  • Hamkor — mahsulotni sotuvchi va yetkazib beruvchi uchinchi tomon (savdo platformasi, CPA tarmog'i yoki sotuvchi tashkilot).

1.4. Ushbu Shartnoma mehnat shartnomasi hisoblanmaydi. Reklamachi Platformaning xodimi emas, ish vaqti va topshiriq belgilanmaydi. Tomonlar o'rtasida fuqarolik-huquqiy munosabat yuzaga keladi.

1.5. Platformada ro'yxatdan o'tish ushbu Shartnomaga to'liq va so'zsiz rozilik (akseptlash) sifatida qabul qilinadi.

1.6. Platforma ushbu Shartnomaga bir tomonlama o'zgartirish kiritish huquqiga ega. Yangilangan tahrir saytda e'lon qilingan paytdan kuchga kiradi. E'lon qilingunga qadar hisoblangan daromadlarga o'zgartirilgan tahrir tatbiq etilmaydi.

2. SHARTNOMA PREDMETI

2.1. Reklamachi o'z imkoniyatlaridan foydalangan holda Platforma offerlarini ijtimoiy tarmoqlar va boshqa internet resurslarida reklama qilish va ularga mijoz jalb qilish xizmatini ko'rsatish, Platforma esa muvaffaqiyatli yakunlangan har bir buyurtma uchun xizmat haqi (daromad) to'lash majburiyatini o'z zimmasiga oladi.

2.2. Reklamachi mustaqil ravishda faoliyat yuritadi: reklama kanalini, usulini, vaqtini va hajmini o'zi tanlaydi.

2.3. Platformadan foydalanish Reklamachi uchun butunlay bepul. Ro'yxatdan o'tish, offerlarga kirish, link yaratish, statistika va pul yechish uchun hech qanday to'lov, badal yoki obuna talab qilinmaydi.

2.4. Platforma Reklamachiga hech qanday reklama byudjeti, sarmoya yoki oldindan to'lov bermaydi va bunday mablag'ni talab ham qilmaydi.

3. RO'YXATDAN O'TISH VA HISOB

3.1. Ro'yxatdan o'tish uchun Reklamachi ism-sharifi, telefon raqami va parolni kiritadi.

3.2. Reklamachi kiritilgan ma'lumotlarning haqiqiyligi uchun javobgardir. To'lov hujjatlari va Xolis hisobi Reklamachining o'ziga tegishli bo'lishi lozim; boshqa shaxsning guvohnomasi yoki hisobini ko'rsatish taqiqlanadi.

3.3. Bir shaxs faqat bitta hisobga ega bo'lishi mumkin. Ko'p hisob (multiakkaunt) ochish, shu jumladan boshqa shaxs nomiga hisob ro'yxatdan o'tkazish taqiqlanadi.

3.4. Hisobga kirish ma'lumotlarining (parol, telefon raqami) maxfiyligi uchun Reklamachi javobgar. Hisobdan uchinchi shaxs foydalangani natijasida yuzaga kelgan oqibatlar uchun Platforma javobgar emas.

3.5. Reklamachi hisobini uchinchi shaxsga sotishi, ijaraga berishi yoki o'tkazishi taqiqlanadi.

3.6. Platforma zarur hollarda Reklamachining shaxsini tasdiqlovchi hujjatni so'rash huquqiga ega, jumladan to'lov bo'yicha shubha yuzaga kelganda.

4. OFFERLAR VA AFFILIATE LINKLAR

4.1. Platforma Reklamachiga mavjud offerlar ro'yxatini, har bir offer bo'yicha narx, daromad miqdori va tavsifni taqdim etadi.

4.2. Reklamachi o'zi tanlagan offer uchun affiliate link yaratishi mumkin. Link orqali kelgan buyurtmalar avtomatik ravishda o'sha Reklamachiga biriktiriladi.

4.3. Buyurtma affiliate link orqali kelmagan yoki texnik sabablarga ko'ra tizimda biriktirilmagan bo'lsa, u bo'yicha daromad hisoblanmaydi.

4.4. Platforma istalgan vaqtda offerlar ro'yxatini, mahsulot narxlarini, daromad miqdorini o'zgartirish yoki offerni to'xtatish huquqiga ega.

4.5. Daromad miqdori o'zgartirilgan taqdirda, yangi miqdor faqat o'zgarish kuchga kirgandan keyin tushgan buyurtmalarga qo'llaniladi. Undan oldin tushgan buyurtmalar bo'yicha daromad eski miqdorda hisoblanadi.

4.6. Offer to'xtatilgan taqdirda, unga oid affiliate linklar ishlamay qoladi. Bu holat to'xtatilgunga qadar tushgan buyurtmalar bo'yicha daromadga ta'sir qilmaydi.

5. DAROMAD HISOBLASH TARTIBI

5.1. Daromad buyurtma "Yetkazildi" holatiga o'tkazilganda hisoblanadi va shu paytda Reklamachi balansiga qo'shiladi.

5.2. Buyurtma "Yetkazildi" holatiga o'tishi uchun quyidagi shartlar bajarilishi lozim:

  • buyurtma operator tomonidan tasdiqlangan bo'lishi;
  • mahsulot mijozga yetkazib berilgan bo'lishi;
  • mijoz to'lovni amalga oshirgan bo'lishi.

5.3. Quyidagi hollarda daromad hisoblanmaydi:

  • mijoz buyurtmani rad etsa yoki mahsulotni qabul qilmasa;
  • mahsulot qaytarilsa;
  • buyurtma operator tomonidan tasdiqlanmasa yoki mijoz bilan bog'lanib bo'lmasa;
  • buyurtma soxta yoki ushbu Shartnomaning 9-bo'limi qoidalarini buzgan holda olingan bo'lsa.

5.4. Buyurtma holati "Yetkazildi" dan boshqa holatga qaytarilgan taqdirda (masalan, mahsulot keyinchalik qaytarilgani aniqlansa), avval hisoblangan daromad Reklamachi balansidan avtomatik ravishda yechib olinadi. Bu haqda balans tarixida tegishli yozuv qoldiriladi.

5.5. Platforma buyurtmalarni tekshirish, Hamkor tizimidagi holat bilan solishtirish va nomuvofiqlik aniqlanganda daromadni qayta hisoblash huquqiga ega.

5.6. Reklamachi o'z buyurtmalari va daromadlarini shaxsiy kabinetdagi "Zakazlar", "Statistika" va "Balans tarixi" bo'limlarida real vaqtda kuzatib borishi mumkin.

5.7. Daromad bo'yicha e'tiroz buyurtma holati o'zgargan kundan boshlab 30 (o'ttiz) kalendar kuni ichida bildirilishi lozim. Ushbu muddat o'tgach, hisob-kitob Reklamachi tomonidan qabul qilingan hisoblanadi.

6. BALANS VA PUL YECHISH

6.1. Hisoblangan daromad Reklamachining platformadagi balansida to'planadi.

6.2. Pul yechish uchun Reklamachi avval shaxsiy kabinetdagi "Pul yechish" bo'limida To'lov hujjatlarini yuklaydi. Platforma hujjatlarni tekshiradi va tasdiqlaydi yoki sababini ko'rsatgan holda rad etadi. Hujjatlar tasdiqlangandan keyin Reklamachi pul yechish so'rovini yuborishi mumkin.

6.2.1. Platforma quyidagilarni tekshiradi: guvohnoma Reklamachining o'ziga tegishliligi (F.I.O. va JSHSHIR mosligi) hamda o'zini o'zi band qilgan shaxs uchun faoliyat turi "Ijtimoiy tarmoqlardagi faoliyat" ekanligi. Yakka tartibdagi tadbirkor guvohnomasi ham qabul qilinadi.

6.2.2. Mablag' faqat tasdiqlangan Xolis hisobiga o'tkaziladi. Boshqa bank kartasi yoki uchinchi shaxs hisobiga to'lov amalga oshirilmaydi.

6.2.3. To'lov hujjatlaridagi har qanday ma'lumot (shu jumladan Xolis hisobi) o'zgartirilganda hujjatlar qayta tekshiriladi va tekshiruv yakunlanguncha pul yechish to'xtatib turiladi.

6.3. Pul yechish shartlari:

  • Minimal summa — 50 000 (ellik ming) so'm. Platforma minimal summani o'zgartirish huquqiga ega; amaldagi qiymat shaxsiy kabinetda ko'rsatiladi.
  • So'ralayotgan summa balansdagi mablag'dan oshmasligi kerak.
  • Bir vaqtning o'zida faqat bitta ko'rib chiqilmagan so'rov bo'lishi mumkin.
  • Reklamachining To'lov hujjatlari Platforma tomonidan tasdiqlangan bo'lishi lozim.

6.4. To'lov so'rov tasdiqlangandan so'ng, odatda 1 (bir) kun ichida Platformaning hisob raqamidan Reklamachining Xolis hisobiga o'tkaziladi. To'lov tizimlaridagi texnik uzilishlar tufayli muddat uzayishi mumkin.

6.5. Reklamachi noto'g'ri Xolis hisobi raqamini ko'rsatgan taqdirda, mablag' boshqa shaxsga o'tib ketishi mumkin. Bunday holat uchun javobgarlik Reklamachi zimmasida bo'ladi. Xolis hisobidan mablag'ni kartaga yechish uchun Paynet tomonidan olinadigan komissiya Reklamachi hisobidan bo'ladi.

6.6. Platforma quyidagi hollarda to'lovni vaqtincha to'xtatib turish huquqiga ega:

  • firibgarlik yoki suiiste'mol bo'yicha asosli shubha mavjud bo'lsa;
  • buyurtmalar bo'yicha tekshiruv olib borilayotgan bo'lsa;
  • Reklamachining shaxsi, To'lov hujjatlari yoki Xolis hisobi egaligi tasdiqlanishi zarur bo'lsa.

Tekshiruv 10 (o'n) ish kunidan oshmasligi lozim. Tekshiruv natijasida qoidabuzarlik aniqlanmasa, to'lov to'liq amalga oshiriladi.

6.7. Balansdagi mablag'ning saqlash muddati cheklanmagan. Reklamachi uzoq vaqt faol bo'lmagan taqdirda ham balansi bekor qilinmaydi va istalgan vaqtda yechib olinishi mumkin.

7. DO'ST TAKLIF QILISH DASTURI

7.1. Reklamachi o'zining shaxsiy referal havolasi orqali platformaga yangi reklamachilarni taklif qilishi mumkin.

7.2. Taklif qilingan do'st pul yechganda, yechilgan summaning 5 (besh) foizi taklif qilgan Reklamachining balansiga bonus sifatida qo'shiladi.

7.3. Ushbu bonus Platforma hisobidan to'lanadi. Taklif qilingan do'stning daromadidan hech narsa ushlab qolinmaydi — u o'z summasini to'liq oladi.

7.4. Bonus do'stning pul yechish so'rovi tasdiqlangan paytda hisoblanadi va muddat bilan cheklanmaydi.

7.5. Referal dasturida quyidagilar taqiqlanadi:

  • o'z nomiga yoki nazorati ostidagi ikkinchi hisobni "do'st" sifatida ro'yxatdan o'tkazish;
  • bir shaxsni bir necha marta turli ma'lumotlar bilan ro'yxatdan o'tkazish;
  • referal havolasini spam tarzda tarqatish.

7.6. Platforma referal dasturi shartlarini o'zgartirish yoki dasturni to'xtatish huquqiga ega. Bunday holatda allaqachon hisoblangan bonuslar saqlanib qoladi.

8. KONKURS VA RAG'BATLANTIRISH

8.1. Platforma vaqti-vaqti bilan reklamachilar o'rtasida konkurslar va rag'batlantirish dasturlarini o'tkazishi mumkin.

8.2. Har bir konkursning muddati, ishtirok shartlari, natijani aniqlash tartibi va sovrin jamg'armasi alohida e'lon qilinadi va shaxsiy kabinetning "Konkurs" bo'limida ko'rsatiladi.

8.3. Konkurs natijalari Platforma tomonidan buyurtmalar statistikasi asosida aniqlanadi. Soxta buyurtmalar hisobga olinmaydi.

8.4. Konkursda qatnashish majburiy emas va daromad hisoblash tartibiga ta'sir qilmaydi.

9. REKLAMACHI MAJBURIYATLARI VA TAQIQLAR

9.1. Reklamachi majbur:

  • faqat halol va haqiqiy trafik jalb qilish;
  • mahsulot haqida ishonchli va haqqoniy ma'lumot berish;
  • O'zbekiston Respublikasining reklama to'g'risidagi qonunchiligiga rioya qilish;
  • foydalanilayotgan ijtimoiy tarmoq va reklama platformalarining qoidalariga rioya qilish;
  • ushbu Shartnoma shartlarini bajarish.

9.2. Reklamachiga quyidagilar qat'iyan taqiqlanadi:

a) Soxta buyurtma va sun'iy trafik:

  • mavjud bo'lmagan yoki xabardor bo'lmagan shaxs nomidan buyurtma rasmiylashtirish;
  • bot, avtomatlashtirilgan skript yoki soxta trafik manbalaridan foydalanish;
  • mijozni aldab yoki majburlab buyurtma berishga ko'ndirish;
  • buyurtmalar sonini sun'iy ravishda oshirishga qaratilgan har qanday harakat.

b) Yolg'on reklama:

  • mahsulotning tarkibi, xususiyati, samarasi yoki narxi haqida yolg'on ma'lumot berish;
  • mavjud bo'lmagan chegirma, aksiya yoki sovg'ani va'da qilish;
  • mahsulotga tibbiy, davolash yoki shifobaxsh xususiyat nisbat berish;
  • mijozni chalg'ituvchi sarlavha, rasm yoki videodan foydalanish;
  • Platforma nomidan mijozga yetkazib berish muddati, kafolat yoki qaytarish bo'yicha o'zboshimchalik bilan va'da berish.

c) Brend nomidan noqonuniy foydalanish:

  • "Birinchi Shop" nomidan rasmiy sahifa, kanal, guruh yoki bot ochish;
  • Platformaning rasmiy vakili sifatida o'zini tanishtirish;
  • birinchishop.uz saytiga o'xshash (nusxa) sayt yoki sahifa yaratish;
  • "Birinchi Shop" brend nomi bo'yicha kontekst reklama joylashtirish;
  • Platforma logotipi va nomidan uning yozma roziligisiz foydalanish.

d) Boshqa taqiqlar:

  • spam — so'ralmagan ommaviy xabar, izoh yoki xat yuborish;
  • qonunchilik bilan taqiqlangan mavzudagi resurslarda reklama joylashtirish;
  • Platformaning texnik ishlashiga aralashish yoki zaifliklardan foydalanish.

9.3. Reklamachining o'zi yoki uning yaqinlari uchun buyurtma berishi taqiqlanmaydi, agar mahsulot haqiqatan sotib olinsa va yetkazib berilgandan so'ng to'liq to'lov amalga oshirilsa. Bunday buyurtma bo'yicha daromad umumiy asosda hisoblanadi. Ayni paytda, faqat daromad olish maqsadida rasmiylashtirilib, keyin qabul qilinmaydigan buyurtmalar 9.2-a bandiga muvofiq soxta buyurtma hisoblanadi.

10. QOIDABUZARLIK OQIBATLARI

10.1. Qoidabuzarlik aniqlangan taqdirda Platforma quyidagi choralarni qo'llash huquqiga ega:

  • Reklamachidan tushuntirish so'rash va tekshiruv o'tkazish;
  • tekshiruv davrida to'lovni vaqtincha to'xtatib turish;
  • qoidabuzarlik natijasida olingan daromadni bekor qilish;
  • hisobni bloklash.

10.2. Qoidabuzarlik aniqlangan taqdirda faqat qoidabuzarlik natijasida hisoblangan daromad bekor qilinadi. Halol yo'l bilan ishlangan va tasdiqlangan daromad Reklamachiga to'liq to'lanadi.

10.3. Hisob bloklanishidan oldin Reklamachi qoidabuzarlik haqida xabardor qilinadi va tushuntirish berish imkoniyatiga ega bo'ladi, bundan ochiq firibgarlik holatlari mustasno.

10.4. Platformaga moddiy zarar yetkazilgan taqdirda, Platforma zararni qonunchilikda belgilangan tartibda undirish huquqini saqlab qoladi.

10.5. Reklamachi tekshiruv natijasi bilan rozi bo'lmasa, ushbu Shartnomaning 14-bo'limida ko'rsatilgan tartibda e'tiroz bildirishi mumkin.

11. SOLIQ MAJBURIYATLARI

11.1. Reklamachi xizmat haqini o'zini o'zi band qilgan shaxs yoki yakka tartibdagi tadbirkor sifatida, Paynet "Xolis" raqamli platformasidagi hisobiga oladi. Amaldagi qonunchilikka muvofiq bunday daromaddan olinadigan aylanmadan olinadigan soliq to'lov tashkiloti (Paynet) tomonidan soliq agenti sifatida ushlab qolinadi va byudjetga o'tkaziladi.

11.2. Platforma xizmat haqini to'liq miqdorda Reklamachining Xolis hisobiga o'tkazadi va undan qo'shimcha ravishda soliq ushlab qolmaydi, agar qonunchilikda boshqacha tartib belgilanmagan bo'lsa.

11.3. Reklamachi o'zini o'zi band qilgan shaxs yoki yakka tartibdagi tadbirkor maqomini saqlab turishi, qonunchilikda belgilangan yillik daromad chegarasiga rioya qilishi va maqomi bekor qilingan yoki o'zgargan taqdirda Platformani darhol xabardor qilishi shart. Bunday holatda yangi hujjatlar tasdiqlanguncha pul yechish to'xtatib turiladi.

11.4. Reklamachi o'z soliq maqomi bo'yicha noto'g'ri ma'lumot berganligi yoki 11.3-band majburiyatini bajarmaganligi natijasida yuzaga keladigan soliq oqibatlari uchun Reklamachi javobgar bo'ladi.

11.5. Platforma Reklamachiga amalga oshirilgan to'lovlar to'g'risidagi ma'lumotlarni (F.I.O., JSHSHIR, summa, sana) qonunchilikda nazarda tutilgan hollarda va tartibda soliq organlariga taqdim etishi mumkin.

11.6. Qonunchilikda o'zgarish bo'lgan taqdirda Platforma to'lov tartibini unga moslashtiradi va bu haqda Reklamachilarni oldindan xabardor qiladi.

12. INTELLEKTUAL MULK VA KONTENT

12.1. Platformaning nomi, logotipi, dizayni va dasturiy ta'minoti Platformaga tegishli bo'lib, ulardan yozma roziliksiz foydalanish taqiqlanadi.

12.2. Platforma tomonidan taqdim etilgan mahsulot rasmlari, videolar va tavsiflardan Reklamachi faqat platforma offerlarini reklama qilish maqsadida foydalanishi mumkin.

12.3. Reklamachi mustaqil ravishda yaratgan reklama materiallariga (video, matn, kreativ, post) bo'lgan mualliflik huquqi Reklamachining o'zida qoladi.

12.4. Reklamachi o'z materialini Platformaga yuklagan yoki taqdim etgan taqdirda, Platformaga ushbu materialdan o'z resurslarida — saytda, ijtimoiy tarmoqlarda, reklama va namunaviy materiallarda — foydalanish uchun bepul, muddatsiz va hududiy cheklanmagan oddiy litsenziya beradi. Materialdan foydalanilganda imkon qadar muallif ko'rsatiladi.

12.5. Reklamachi o'zi joylashtirgan material uchinchi shaxslarning mualliflik huquqini buzmasligini kafolatlaydi. Bunday da'volar yuzaga kelsa, javobgarlik Reklamachi zimmasida bo'ladi.

13. JAVOBGARLIK VA KAFOLATLAR

13.1. Platforma majbur:

  • buyurtmalar hisobini va statistikani yuritish;
  • daromadni ushbu Shartnomada belgilangan tartibda hisoblash;
  • tasdiqlangan pul yechish so'rovlari bo'yicha to'lovni amalga oshirish;
  • qo'llab-quvvatlash xizmatini ko'rsatish;
  • Reklamachining shaxsiy ma'lumotlarini himoya qilish.

13.2. Platforma javobgar emas:

  • Reklamachining daromad miqdori va uning barqarorligi uchun — daromad kafolatlanmaydi;
  • Hamkor tomonidan yetkazib berilgan mahsulotning sifati va yetkazib berish muddati uchun;
  • mijozning buyurtmani rad etishi yoki mahsulotni qaytarishi uchun;
  • Reklamachi foydalanayotgan ijtimoiy tarmoq yoki reklama platformasining qarorlari (sahifa bloklanishi, reklama rad etilishi) uchun;
  • Reklamachi reklama uchun sarflagan mablag' uchun;
  • internet, aloqa yoki to'lov tizimlaridagi texnik uzilishlar oqibatlari uchun.

13.3. Platforma hech qanday aniq daromad miqdorini kafolatlamaydi. Saytda yoki reklama materiallarida keltirilgan daromad misollari ayrim reklamachilarning natijasi bo'lib, kafolat hisoblanmaydi. Haqiqiy daromad Reklamachining faolligi, trafik sifati va bozor holatiga bog'liq.

13.4. Tomonlar yengib bo'lmaydigan kuch holatlari (fors-major) tufayli majburiyatlarni bajara olmaganliklari uchun javobgar bo'lmaydilar.

14. NIZOLARNI HAL QILISH

14.1. Nizolar avvalo muzokaralar va da'vo tartibida hal qilinadi.

14.2. Reklamachi murojaatini qo'llab-quvvatlash xizmatiga (Telegram: @birinchishop_support) yuborishi mumkin. Murojaat kelib tushgan kundan boshlab 10 (o'n) ish kuni ichida ko'rib chiqiladi.

14.3. Kelishuvga erishilmagan nizolar O'zbekiston Respublikasining amaldagi qonunchiligiga muvofiq sud tartibida hal qilinadi.

15. SHARTNOMANI BEKOR QILISH

15.1. Reklamachi istalgan vaqtda, sabab ko'rsatmasdan hamkorlikni to'xtatish va hisobini yopishni so'rash huquqiga ega.

15.2. Hamkorlik to'xtatilganda balansdagi qolgan mablag' Reklamachiga to'liq to'lanadi, shu jumladan summa minimal yechish miqdoridan kam bo'lgan taqdirda ham.

15.3. Yakuniy hisob-kitob hali yakunlanmagan buyurtmalar o'z holatiga kelgach amalga oshiriladi. Bu odatda 30 (o'ttiz) kalendar kunidan oshmaydi.

15.4. Platforma ushbu Shartnomani Reklamachini 7 (yetti) kalendar kuni oldin ogohlantirgan holda bekor qilish huquqiga ega. Bunday holatda ham balansdagi mablag' to'liq to'lanadi.

15.5. Shartnomaning 9-bo'limi qoidalari qo'pol buzilgan taqdirda Platforma Shartnomani oldindan ogohlantirmasdan bekor qilishi mumkin. Bunday holatda hisob-kitob 10.2-bandga muvofiq amalga oshiriladi.

16. YAKUNIY QOIDALAR

16.1. Ushbu Shartnoma Reklamachi ro'yxatdan o'tgan paytdan kuchga kiradi.

16.2. Reklamachining shaxsiy ma'lumotlari Maxfiylik siyosatiga muvofiq qayta ishlanadi. To'lov hujjatlari (guvohnoma nusxasi, JSHSHIR) faqat to'lovni amalga oshirish, hisob-kitob va qonunchilik talablarini bajarish maqsadida saqlanadi, uchinchi shaxslarga ochiq e'lon qilinmaydi va faqat Platforma ma'muriyatiga ko'rinadi.

16.3. Ushbu Shartnomaning biror bandi haqiqiy emas deb topilsa, bu qolgan bandlarning haqiqiyligiga ta'sir qilmaydi.

16.4. Ushbu Shartnomada tartibga solinmagan masalalar O'zbekiston Respublikasining amaldagi qonunchiligiga muvofiq hal qilinadi.

16.5. Shartnomaning amaldagi tahriri doimiy ravishda birinchishop.uz/oferta-shartnomasi-adv manzilida joylashtiriladi.

17. PLATFORMA REKVIZITLARI

Tashkiliy-huquqiy shaklYakka tartibdagi tadbirkor (YTT)
NomiNazarov Anvar
Davlat ro'yxatidan o'tgan sana10.04.2026
Guvohnoma raqami7676916
ShaharToshkent sh., Yunusobod tumani
Veb-saytbirinchishop.uz
AloqaTelegram: @birinchishop_support

Hujjat sanasi

16.10.2026

Sayt

birinchishop.uz

Murojaat

@birinchishop_support

Rekvizitlar

birinchishop.uz platformasi va Birinchi Shop brendi egasi — YaTT Nazarov Anvar (yakka tartibdagi tadbirkor), Toshkent sh., Yunusobod tumani, O'zbekiston. 2026-yil 10-aprelda davlat ro'yxatidan o'tgan, guvohnoma № 7676916.

Rasmiy nomiYaTT Nazarov Anvar
Huquqiy shakliYakka tartibdagi tadbirkor (YaTT), O'zbekiston
Egasi va asoschisiAnvar Nazarov
Davlat ro'yxatidan o'tgan sana2026-yil 10-aprel
Guvohnoma raqami7676916
Faoliyat turiReklamani ishlab chiqish va joylashtirish
ShaharToshkent sh., Yunusobod tumani, O'zbekiston
Saytbirinchishop.uz
Rasmiy Telegram@birinchishop_support (yordam), @birinchishop_kanal (video darslar), @birinchishop_chat (reklamachilar guruhi), @Birinchishop_bot (bot)
Ijtimoiy tarmoqlarInstagram @birinchishop.uz, YouTube @birinchishop_cpa
HujjatlarHamkorlik shartnomasi (reklamachilar uchun oferta)
Ommaviy oferta (xaridorlar uchun)
Maxfiylik siyosati

Русский: /oferta-shartnomasi-adv?lang=ru · English: /oferta-shartnomasi-adv?lang=en · birinchishop.uz